قررت أخد الخطوة

قررت أخد الخطوة
وأعيش بمرتبى
ومش هاخد تانى رشوة
وهقفل درج مكتبى
أنا كنت قالبها تكية
لحسابى فى الشغل زمان
وكنت باخد ضعف المهية
رشوة م القادر والغلبان
كنت ف وش الناس بكشر
وكتير فيهم أكدر
وما كنتش بشوف شغلى كويس
ما أعرفش كسل ولا كنت بستهتر
وقفّت مراكب أنها تسير
ولففت الناس ياما مشاوير
وكان الروتين ف شغلى سبب
تعطيل مصالح ناس كتير
كان زمان شعارىفوت كمان يومين
واللى كان شاغل أفكارىبكام هملى الجيبين
واللى كان بيدفع بيخلص
واللى ماكنش كان بيشوف الأمرّين
والنهارده بعد الثورة
قولت هعيش بمرتبى
ومش هاخد تانى رشوة
وهقفل درج مكتبى
وهبتدى أعيش بمبدأ
وهبطل أكشر وأتخلق
ومش هعطل مصالح الناس
وف المعاملة بينهم ما هفرق
هشوف شغلى كويس
وهبطل الروتين
وع الناس هبطل أغلس
بفوت كمان يومين
بس ياريتك تهتمى يا حكومة
وتعلى المرتبات
عشان ما تخليش موظفين بالحكومة
زيى يقولوا للمواطن هات
دا فى موظفين كتير مظلومة
عايشة على الفتات
يا ريتك تهتمى يا حكومة
وما تعمليش زى نظام فات
يامواطن بلدى يا كريم
معاك هعمل اللى عليّا ومش هقول لأه
بس ممكن تسبنى ماشى ع النظام القديم
لحد ما أخلص قسط العربية والشقة؟