نحن في زمن المجلس العسكري
أنا بشهدك وبشهد التاريخ أهو.. انتو الاتنين قاعدين على كنبة واحدة سامعين وشايفين كل حاجة وانا مش هكدب عليكو
الحالة بعد الثورة وحشة أوي، الحالة الاقتصادية يعني. الحال نايم وقطاعات كتيرة حصل فيها كساد زي السياحة والأسعار مولعة نار والناس مش طايقة
وإن جيتو للحق وقف الحال ده سببه واحد، واحد بس.. المجلس العسكري
أيون، وربنا كلمة حق اتحاسب عليها قصاد رب كريم يوم لا ينفع فيه الندم.. المجلس العسكري هو سبب وقف الحال ده. لو الظرف كان مختلف كان اللي مسك مصر بعد الثورة على طول عمل انتخابات برلمان وانتخابات رئاسة وجه رئيس بقى يخطط ويبني نهضة مصر الحديثة ويجيب حكومة تاخد قرارات مصيرية وتنفذها
اللي حاصل دلوقتي، ان شاء الله تعدموا ضحكتي من على وش الأرض إن كنت بكدب، إن المجلس العسكري بقالة ست شهور ماسك البلد ولحد دلوقتي مافيش انتخابات، ولا نظام جديد ولا عصر جديد ولا عهد جديد .. نحن في برزخ
برزخ ضيق وبيضيق كل يوم عشان الحكومة الانتقالية خايفة تسير الأعمال لأنهم عارفين انهم مؤقتين، والمؤقت طبيبعي مش عايز يبقى مسئول ومتعلقة حاجة في رقبته
المجلس العسكري لاعب في الساعة وموقف العقارب قال يعني بيجهز للعصر الجديد براحته، بس الزمن مابيقفش بوقف العقارب .. الميكانيكا العسكرية دي مابتأكلش عيش ولا بتدي مرتب ولا بتمشي مرور ولا بتستر حال
حالنا بقى يصعب ع الكافر والسبب المجلس العسكري والبرزخ اللي موقفنا فيه ده
يرضيكي كده يا مصر؟ يرضيك كده يا تاريخ؟
ماتعرفوش نائب عام يعرف ربنا أقدم له بلاغ اشتكي المجلس العسكري بوقف عجلة الانتاج؟
ليست هناك تعليقات:
إرسال تعليق